يوم العدس العالمي الرمضاني
المكان : بيت محسن
الزمان : اليوم الرابع عشر من رمضان 2003
يا بنى اقعد أنا عامله فراخ و مكرونه بالبشاميل ومحشى و بوفتيك . اقعد يا بنى افطر معانا
انطلقت الكلمات من امى كالرصاص تحثنى على البقاء و الاكل مع العائلة
بيبو : بصى يا ماما انا معزوم عند استاذ محسن و انا مش لوحدى معايا زميلى
امى : يا ابنى انا خايفه متاكلش كويس
بيبو : لا متاخفيش يا ماما
ماما : يا بنى محسن ده بخيل وانا عارفه
بيبو : ماما عيب عليكى محسن ده ابو الكرم
ماما : يا بنى ده انا فاكرة قابلنى فى اتوبيس و كان معاه فلوس و قالى ممكن يا طنط تدفعيلى
بيبو : يا ماما تلاقيه كان بيهزر اصل هو خرشوف شوية مع الناس الكبيرة
ماما : خرشوف يعنى ايه
بيبو : يعنى مزوزغ
ماما : مزوزغ يعنى ايه
بيبو : يعنى مش متودق . يعنى قريحى . سلوفى منوفى
ماما : يعنى ايه مش فاهمة
بيبو : هاقولك بعدين
ماما : يا ابنى انت الفاظك بقت كده عامله زى مش عارف ليه كده يا بنى
بيبو : ماما كده هاتاخر و أبقى سيبيلى نصيبى من الفراخ
ماما : نصيب ايه انت ناسي أن انا عازمة خطيب أختك و عائلته
بيبو :يعنى مفيش نصيب هيبقى ليا
ماما: لا طبعا
بيبو : مش مهم محسن عامل ديك رومي
و قابلت هشام قبل الفطار بربع ساعة و كان بيت محسن قريب منا
بيبو : هشام بسرعه الديك الرومي بيندينا
هشام : حاضر قوام
بيبو : اهو البيت اهو
طلعنا و خبطنا و ضربنا الجرس و انفتح الباب
بيبو : ازيك يا عمو
ابو محسن : ازيك يا ابنى عايز حاجه
بيبو : لا يا عمو ... احم ... احم... محسن موجود
ابو محسن : لا يا بنى عايزه ليه و ايه اللى فى جابك فى وقت زى ده ) صرخ فينا )
بيبو : يا عمو من غير نرفزه هو عزمنا على الفطار
ابو محسن : عزمكوا انتوا يا ادى الخيبة على الواد
المهم جت أم محسن أنقذتنا
أم محسن : ايوه يا ابو محسن هما دول دخلهم
دخلنا جوه طبعا بعد فاصل خناق و اللى زاد الطين بله ان هشام فضل يزعقلى
اننا جينا و قعد يقولى ده انه هربى محسن لما يشوفه
طبعا فاضل على الفطار 10 دقايق . وسمعنا صوت خناق جاى من الصالة
ابو محسن : يا وليه نعملهم ايه هو فيه أكل أصلا ده انا كنت ها خدك ننزل نفطر
و قلت بالمرة اعزمك على مائدة رحمن
أم محسن : يا خويا. يا دي الكسوف الواد راح يتغدى فى ماك
المرغنى و سايب زميله هنا . الحل انا انزل اجيبلهم فرخة ولا حاجه
دول صايمين يا حبه عينى
ابو محسن : نعم ده انت عمرك معملتيها معايا فراخ ايه متجيبلهم كباب احسن
ام محسن : امال نعمل ايه راجل
ابو محسن : انت طبخه ايه
ام محسن : انا طبخه عدس
ابو محسن : عدس عال قوى قوى هما لاقيين اصلا دول شكلهم شحاتين
هشام : لا يا عم دول بيغلطوا فينا انا ماشى
بيبو : يا عم اقعد افرض محسن جه هيقول علينا ايه بس
مدفع الافطار اضرررررررررررررررررررررررب
حان ألان موعد اذان المغرب حسب التوقيت المحلى لمدينه القاهرة
ام محسن دخلت علينا بطبقين العدس و كوبيتن مياه و شويه بلح
ام محسن : بالهنا و الشفا هنفطر انا و الحج بره عشان نسيبكوا براحتوا
بيبو : متيجوا تأكلوا معانا يعنى والله ... احم... احم
هشام: ديك رومي يا بيبو . ***** ....
طبعا النقط دي فيها سب و شتيمة هشام نسى اصلا ان هو فى رمضان
ابو محسن : فيه ايه يا جماعه
بيبو : ابدا يا حاج ارجوك طبق كمان عدس كماله لهشام صدقني إحنا عمرنا مكلنا
طبق عدس بالجمال ده
ام محسن : بس يا بنى انتوا مكلتوش حاجه
بيبو : مش مهم يا طنط المهم اننا عايزين طبق تانى لهشام
ابو محسن : يا ابنى هو افتراء و خراب ديار
بيبو : يا حج صدقني هت طبق بس
ابو محسن : هاتيلو طبق يا ستى ايه البلاوى دى انا داخل اكمل فطارى
بيبو : شكرا يا امى . بصراحه السلطه والطحينه هايله جدا ... ارجوك ممكن طبق طحينه كمان
ام محسن : هو انا جبتلك طبق اولانى يا ابنى
بيبو : يا طنط بضحك معاكى
هشام قام و جرى و فتح الباب و مشى
ام محسن : ماله يا طنط
بيبو : ما ملوش يا طنط شكرا جدا على الفطار الحق الفراخ احسن
طبعا روحت لقيت البيت زحمة
و قبل السحور بساعه
ماما : بيبو شيل الزباله روح ارميها
بيبو : نصيبى فى الفرخه فين يا ماما
ماما : عبارة عن عظم فى الزباله هتعرف ترمى الزباله
بيبو : اه طبعا ... اللى ميعرفش ياكل عد س
بيبو
يونيو2007
No comments:
Post a Comment